Ամբողջ աշխարհում

Էներգախնայողության միջազգային օրը նշվում է նոյեմբերի 11-ին։
Այն հիմնադրվել է 2008 թվականին՝ SPARE միջազգային կրթական ծրագրի («Էներգիայի և ռեսուրսների օգտագործման դպրոցական ծրագիր») նախաձեռնությամբ։ Որոշումը կայացվել է Ղազախստանում կայացած SPARE-ի միջազգային հանձնաժողովի նիստի ընթացքում, իսկ արդեն նույն տարվա նոյեմբերին տոնը առաջին անգամ ընդգրկեց աշխարհի ավելի քան 20 երկրներ՝ ստանալով միջազգային նշանակություն։
Այս օրվա հիմնական նպատակը հասարակության ուշադրությունը կենտրոնացնելն է էներգիայի խնայողության, ռեսուրսների խելամիտ օգտագործման և վերականգնվող էներգիայի աղբյուրների զարգացման վրա։
Հայաստանում ևս վերջին տարիներին մեծ ուշադրություն է դարձվում էներգաարդյունավետությանը։ Պետություն-համայնք-ՄԱԶԾ համագործակցության շրջանակում իրականացվում են շենքերի ջերմաարդիականացման ծրագրեր, որոնք նվազեցնում են բնակիչների ջեռուցման ծախսերը, կրճատում էներգասպառումը և դրան ուղեկցող ջերմոցային գազերի արտանետումները։
Մասնավորապես, «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագիրը (2017-2023) իրականացվում է ՄԱԿ-ի Զարգացման ծրագրի հայաստանյան գրասենյակի կողմից՝ Կլիմայի կանաչ հիմնադրամի ֆինանսավորմամբ և ՀՀ շրջակա միջավայրի նախարարության համակարգմամբ։
Էներգախնայողությունը միայն տեխնիկական լուծում չէ, այլև կյանքի որակի բարելավման միջոց ու ապրելակերպ։ Այն օգնում է պաշտպանել բնությունը, խնայել չվերականգնվող ռեսուրսները և նվազեցնել օդի աղտոտումը, քանի որ էներգիայի մեծ մասը դեռ ստացվում է հանածո վառելիքի այրման միջոցով։
Ուստի կարևոր է, որ յուրաքանչյուրը ձգտի օգտագործել էներգիան խելամտորեն՝ ներդնելով իր փոքր, բայց կարևոր նպաստը ընդհանուր բնապահպանական մարտահրավերների հաղթահարմանը։